Grit anaoudegezh gant…

Josilin

Un ehan a bouez, war ribl an Oud, eo Josilin pa vezer war hent an Duged. Liammet eo da vat istor ar gêr gant istor he c'hastell a zo a-us dezhi. Savet eo diouzh ar stumm gotek flammheñvel. Ur skouer dedennus-tre eus an doare a oa da sevel tiez da vare ar Grennamzer hag an Azginivelezh. Savet e oa bet e penn-kentañ an 11^vet kantved ha hiziv an deiz ez eo ar familh Roc'han, a zo diskennidi eus ar re o doa lakaet sevel anezhañ, zo o chom ennañ bepred. Kemerit amzer da vont da vale el liorzhoù. Krouet e oant bet gant Achille Duchesne, ur gweledvaour hag en doa labouret e Vaux-le-Vicomte ivez.

Ur fabourz eus ar Grennamzer

Ken kozh hag ar c'hastell eo Karter ar Groez Santel, bet renevezet evel zo dleet e 2006. Savet e oa bet en-dro d'ar chapel vrav, anvet Sainte-Croix ivez. Eno e kaver un toullad tiez kaer o frammoù koad. Eus 1538 eo an hini koshañ anezho

A-hed an Oud

Loc'hit eus an ti-skluz evit gweladenniñ ar c'hornad a-hed an Oud. Plijet-kaer e viot gant troiad Traonienn an Oud, balizennet e melen. Ezhomm ho po war-dro teir eur war-droad evit ober 12 kilometr ar valeadenn e-mesk ar glasvez, an ilizoù gotek hag an tiez kozh. Gallout a reer ober an droiad-se war varc'h-houarn ivez.

Daoust ha gouzout a raec'h ?

Un delwenn vurzhudus

Hervez an hengoun e vije bet kavet e-barzh ur c'hoad-med, gant ur peizant eus an 9^vet kantved, un delwenn eus ar Werc'hez he dije addegaset ar gweled d'e verc'h a oa dall. Buan a-walc'h e teuas ar santual a voe savet da zegas da soñj eus ar burzhud, da lavaret eo ar benniliz Itron-Varia an Drein e Josilin, da vezañ ul lec'h pirc'hirinañ evit an dud klañv. Distrujet e voe delwenn ar Werc'hez e-kerzh an Dispac'h. Graet ez eus bet unan all abaoe da lakaat en he flas.

Liens utiles

Office de tourisme du Pays de Josselin

Dol (ha Menez-Dol)

Daoust ha gouzout a raec’h e voe Dol, bet kêr-benn relijiel ar roue Nominoe en 9vet kantved, ur gêr eskobel betek an 19vet kantved ? An iliz-veur, ur monumant pouezus evit a sell ouzh ar stil gotek breizhek, zo test eus an amzer dremenet speredel-se hag a zo dellezek da vezañ gweladennet. Na chomit ket da vamañ ouzh he zalbenn dolzennek hepken, kit da welet pegen mistr ha skañv eo en diabarzh. Ha m’ho peus c’hoant da c’houzout hiroc’h e c’hallit mont da welet Mirdi an IIizoù-meur, a-dal d’an iliz-veur evit kompren penaos e veze savet an ilizoù-meur en Europa.

Beaj er Grennamzer

Ouzhpenn an iliz-veur ez eo ivez gant an annezoù eus Straed Vras ar Stuarted e viot lakaet dindan gazel-ge. Parit ho selloù etrezek an tiez porched ha pileroù evit bamañ outo. Ti ar paledoù bihan, eus an 12vet kantved, zo unan eus koshañ tiez Breizh !

Ur menez mojennoù

War-hed 3 km eus kêr emañ Menez-Dol. Ur roc’h greunit eo, 65 m a uhelder dezhi zo bet awenet e-leizh a vojennoù ganti. Kontet e vez o dije stourmet sant Mikael hag an diaoul an eil ouzh egile eno. Gant roudoù eus skilfoù ha revr an diaoul, kerkoulz hag enlouc’h sant Mikael, e ouzomp e oa bet eus an emgann mojennel-se. E lec’h all ez eus traoù da vamañ outo ivez. Estlammit kentoc’h ouzh ar bae en em astenn dirazoc’h. Etre Konkaven ha Granville, hep ankounac’haat Menez-Mikael-ar-Mor.

Daoust ha gouzout a raec’h ?

(pe Mammouted, arzhed ha frikorneged)

En 19vet e oa bet graet furchadegoù ha gant-se e oa bet lakaet ur gwelead pouezus eus henoadvezh ar maen e gouloù. Bez’ e oa relegoù loened a-zegadoù, en o zouez mammouted, frikorneged hag arzhed zoken !

Liens utiles

Mont Dol

Ar Roc'h-Ugu (ha traonienn an Trev)

A-viskoazh eo bet al lec'h m'emañ ar Roc'h-Ugu, war valir a-us ur gildroenn gev eus ar stêr, ul lec'h eveshaat a-zoare. Er 15^vet kantved e lakaas Katell Trogindi sevel ar c'hastell a weler bremañ c'hoazh, el lec'h ma oa bet savet ur c'hastell kreñv en 11^vet kantved a zo chomet un toullad mogerioù-kreñv war e lerc'h. It da vale er park, da gantren e liorzh al louzeier ha kemerit Hentig ar Sav-heol. Pa viot en em gavet war ar beg, digorit bras ho taoulagad ! Sebezet e viot gant ar gwel meur ho po war ar c'hornad.

“Venezia vihan Bro-Dreger”

Un toullad kilometroù ac'hano emañ Pontrev (“ar pont war an Trev”), unan eus an 22 a gêrioù bihan neuziet-kaer e Breizh. Savet eo bet war bord an dour, gant-se e vez graet “Venezia vihan Bro-Dreger” outi en ur mod sichant. Evit ober anaoudegezh ganti n'eus ket gwelloc'h eget mont da bourmen war an Trev. Gallout a reer bizitañ an 50 stêr-gannañ a zo er gêr e bourzh ur bark, etre an nevezamzer hag an diskar-amzer.

He zreid en dour

Gwechall e oa Pontrev ul lec'h tremenerezh a bouez, ur porzh ma veze eskemmoù etre an Argoad hag an Arvor. Eno e veze kavet goredoù niverus evit pesketa silioù pe eoged, milinoù-bleud pe milinoù-paper. Ken kaer ha gwechall eo chomet ar gêr neuziet-kaer-se en deiz a hiziv. Kemerit straed pavezet Sant Erwan. Mont a ra eus plasenn Erwan an Troker betek plasenn ar Frankiz.

Daoust ha gouzout a raec'h?

pe Aze emañ bepred !

En 11^vet ha 12^vet kantved e voe savet dek kreñvlec'h war ribloù aber an Trev. Hiziv an deiz ne chom anezho nemet kastell ar Roc'h-Ugu !

Liens utiles

Pontrieux Communauté

Domaine départemental de la Roche Jagu

Beg ar Raz

Beg ar Raz, brav ha gouez, rummet "Lec'hiad bras broadel", zo war-dro 70 m a uhelder. Ar Beg, stummet gant ar mor ha skoet gant ar seizh avel, a dalvez e-unan kement hag ur veaj er c’horn-bro ken souezhus-eston eo. A-dal dezhañ emañ an tour-tan karrezennek zo war enezennig ar Wrac'h Vras. Enaouet e oa bet e 1887 evit ar wech kentañ hag emgefrekaet e 1995. Betek-henn e veze diwallerien lerc'h-ouzh-lerc'h oc'h ober war e dro pa veze gwall lous an amzer peurliesañ.

Degemer mat e penn ar bed

Baleerien, seurferien, gant al lec'hiad-se a veze doujet gwechall-gozh gant ar vartoloded, oc'h pedet d'ober sport ha da arvestiñ ouzh an natur. Evit ar re gentañ ez eus ur wenodenn balizennet a-hed bord an tornaodoù. Evit an eil re emañ Bae an Anaon o c'hortoz anezho evit seurfiñ ur pennadig. Gallout a raio an dud fri-furch hag an dud dizaon mont betek tor norzh Toull an Ifern e-lec'h ma kave ar briñsez Dahut an dizober diouzh he c'harediged, hervez ar vojenn. Ur beg strizh a valir a-us d'ar gwag. Diwallit, skrijadennoù a vo !

Gwareziñ a-dost

Ar C'hab zo ivez lec'h-annez a-leizh a laboused-mor, en o zouez ar gouelaniged maskl du brudet. Abaoe 1996 eo gwarezet Beg ar Raz : parklec'h en antre, bulzunoù tredan, gwenodennoù balizennet... Gant diarbennoù na c'haller ket ober hepto e c'haller gwareziñ kempouez ekologel ar Beg daoust ma vez ouzhpenn ur milion a douristed o tont di bep bloaz. Mirout a ra al lec'hiad e neuz ouez dibar neuze.

Daoust ha gouzout a raec’h ?

Ul lec'hiad gweladennet-mat

Piv ne anavez ket Beg ar Raz ? Ne baouez ket an douristed da chom a-sav eno da veuliñ ar gwel meur sebezus, evel diskouezet gant ar c'hartennoù-post a vez gwerzhet a vil vern. Ar c'hartennoù-post a vez gwerzhet ar muiañ e Breizh eo ar re a vez taolennet Beg ar Raz warno.